Samstarf heimila og skóla

Með nýrri aðalnámsskrá Grunnskóla 1999 er lögð gríðarleg áhersla á gott og traust samstarf heimila og skóla enda benda flestar rannsóknir til þess að með aukinni þátttöku foreldra í skólastarfi barna sinna stuðli þeir að bæði betri námsárangri þeirra og hegðun. Með stuðningi foreldra m.a. við heimanám barna sinna má auka líkur á að börnin nái góðum árangri í skólanum. Afar brýnt er að traust ríki í samskiptum heimila og skóla og að báðir aðilar geti tjáð sig um málefni sem koma nemendum til góða. Dalvíkurskóli hefur lagt áherslu á að meta og leita leiða til að bæta samstarf heimila og skóla og stefnir að því að foreldrar fái aukin tækifæri til að styðja við nám barna sinna og auka þar með líkur á að barninu/börnunum farnist vel í skólanum.
Allir skólarnir á Út-Eyjafjarðarsvæðinu taka þátt í þessu verkefni og er Ingibjörg Auðunsdóttir hjá Skólaþróunarsviði kennaradeildar Háskólans á Akureyri ráðgjafi skólanna. Hún kynnti starfsfólki skólanna kenningar Epstein í ágúst 2002. Epstein þykir meðal fremstu fræðimanna á þessu sviði í dag og samstarfslíkan hennar sem skólarnir fara eftir þykir skilvirk leið til að auka og bæta samstarf heimila og skóla.
Skipaður var sérstakur aðgerðarhópur sem hefur yfirumsjón með verkefninu.
Í honum eiga sæti:
Anna Baldvina Jóhannesdóttir skólastjóri, Katrín Fjóla Guðmundssdóttir verkefnisstjóri, Guðbjörn Gíslason fulltrúi fræðsluráðs, Ásta Einarsdóttir og Sigríður Gunnarsdóttir fulltrúar kennara, Valdís Guðbrandsdóttir, Anna Margrét Halldórsdóttir, Anna Hafdís Jóhannsdóttir og Margrét Ásgeirsdóttir.

Samstarf heimila og skóla veturinn 2003-2004

Samkvæmt niðurstöðum stýrihóps 2002-2003 átti skólaárið 2003-2004 að beinast að uppeldi, samskiptum og ákvarðanatöku.
Í framhaldi af því ákvað skólinn að sækja um þátttöku í átaksverkefni Olweusar gegn einelti en það er þriggja ára verkefni þar sem unnið er markvisst að því að bæta líðan nemenda og vinna forvarnarstarf gegn einelti. Á haustdögum voru teknir upp bekkjarfundir í hverri bekkjardeild þar sem ákveðin fræðsla um mannleg samskipi, kurteisi og fleira á sér stað auk þess sem rætt er um gildi góðra samskipta og hvernig koma megi í veg fyrir einelti.
Þá hittist starfsfólk skólans ásamt starfsfólki íþróttahúss og sundlaugar á 2-3ja vikna fresti og fer yfir hvernig gengur ásamt því að leggja drög að hvað rætt skuli um á bekkjarfundum næstu vikur.
Í nóvember var lagður staðlaður spurningalisti fyrir alla nemendur í 4. – 10. bekk þar sem viðhorf þeirra til eineltis og líðanar var kannað. Niðurstöður úr þeirri könnun voru svo kynntar í mars. Þar kom margt forvitnilegt í ljós en helstu niðurstöður voru þær að:
• Í Dalvíkurskóla mælist minna einelti en í viðmiðunarskólunum.
• Einelti á sér helst stað meðal drengja á miðstigi (4.- 7. bekk).
• Einelti á sér oftast stað á skólalóðinni.
• Yrt einelti er algengasta form eineltis í skólanum.
• Högg og spörk eru sjaldgæf.
• Allir drengirnir sem töldu sig verða fyrir einelti höfðu sagt einhverjum fullornum frá því.
• Flestir nemendur töldu umsjónarkennarann reyna að koma í veg fyrir og stöðva einelti.
Eftir að starfsfólk skólans hafði farið yfir niðurstöðurnar var ákveðið að setja nokkur atriði í forgang. Ákveðið var að reyna að kortleggja betur hvar og hvernig einelti á sér stað á skólalóðinni og í því skini var farið að skrá niður alla árekstra í frímínútum. Einnig er skráð ef barni skortir leikfélaga og er mikið eitt. Einnig var ákveðið að kenna útileiki í frímínútum að vori. Þá var ákveðið að gera átak gegn ljótu og særandi orðbragði.
Kennsla í útileikjum var ekki markviss í maí eins og til stóð en kennarar voru þó nokkuð duglegir að fara með bekkina sína út í leiki t.d. á alþjóðlegum degi hreyfingar. Kennarar á yngsta stigi tóku einnig fyrir orðbragð á bekkjarfundum í maí og sendu auk þess bréf heim þar sem tilmælum var beint til foreldra að ræða þessi mál við börn sín. Ákveðið er að þessu starfi verði haldið áfram næsta haust.